Gilberto François (Betico) Croes

Gilberto François (Betico) Croes a nace dia 25 di januari 1938 den e pueblo di Santa Cruz. Maestro tabata su profesion, pero bida a haci'e dirigente di su pueblo.

Destino a haci cu el a bira un luchador cu a rebiba y realisa e lucha di e pueblo Arubano pa su libertad.

Betico Croes tabata e homber cu a entrega su bida pa un lucha, pa un ideal, pa un pueblo.

Betico tabata e politico cu a enfrenta publico riba plataforma internacional pa vocifera e mensahe di e pueblo Arubano.

El a logra saca Aruba for di e isolacion insular pa present'e dilanti di pueblonan di mundo como e isla cu a deshaci di su tamaño fisico pa acepta un tamaño estatal, marca pa e curashi di kier a tuma e destino den su propio man.